Af frábærum landsleik og kynbundnum sektarmun

Var að koma af frábærum landsleik Íslands og Slóveníu. Ísland var algert yfirburðarlið á vellinum og sáu andstæðingarnir aldrei til sólar en leikurinn endaði með 5-0 sigri Íslands. Allar áttu íslensku stelpurnar frábæran leik en Margrét Lára sýndi það enn og sannaði hvað hún er mikilvæg fyrir liðið þar sem hún var með þrennu í leiknum og skoraði sitt 40. mark fyrir landsliðið. Þóra markmaður var heppin að sólin skein því enga fékk hún hreyfinguna. Nú er næsta skref bara EM, þær klára það dæmi ef þær leika eins og í dag. Hefði bara viljað að fleiri hefðu notið þess að fylgjast með leiknum því mætingin var ekki nógu góð.

Gæti verið að slök mæting sé Bílastæðasjóð að kenna?

Það voru fleiri en leikmenn íslenska landsliðisins sem gengu vasklega fram. Starfsmenn Bílastæðasjóðs áttu líka flottan leik fyrir borgina og spiluðu djarfan sóknarbolta þar sem þeir mættu á bílastæðin kl. 14.00, á sama tíma og leikurinn byrjaði og sektuðu alla sem lögðu utan stæða við Laugardalinn. Ég Kópavogsbúinn borga þessa sekt auðvitað glaður þar sem ég þekki stöðu borgarsjóðs. Það hlýtur samt að vera umhugsunarvert fyrir KSÍ hvort jafnræðis sé gætt á milli karla og kvennaknattspyrnu í þessum efnum og eins hvort þessari aðferð er beitt við alla viðburði í Laugardalnum eins og t.d. stórsýningum og tónleikum. Þarna hlýtur að þurfa að gæta jafnræðis og eitt er víst að ef um kynbundin sektarmun er að ræða þá er Bílastæðasjóður ekki í góðum málum. Sendi hér með boltann yfir til Jafnréttisstofu.

Athugasemdir

[Sigurður Þórðarson, 21.6.2008 kl. 22:49]

Sæll Ármann, þú sast þremur röðum fyrir neðan mig.  Stöðumælaverðirnir hefðu mátt sýna spariskapið í tilefni af landsleiknum, sólstöðum  og góða veðrinu. En þeir fá borgað fyrir að vera með hálfgerð leiðindi og eiga alla mína samúð.

Annars held ég að þetta  sé einhver mesta (einu sinni mættu helmingi fleiri)  mæting á kvennaleik og vonandi merki um aukin áhuga.  Frábær skemmtun.

[Ármann Kr. Ólafsson, 21.6.2008 kl. 23:07]

Sæll Sigurður. Tek undir það að verðirnir voru bara að vinna sína vinnu og eiga líka alla mína samúð. Ég var ekki að beina þessu gegn þeim heldur þeim sem stjórna og kannski fyrst og fremst jafnræðisreglunni. Er þetta alltaf gert með þessum hætti? Er þetta líka gert á leikjum karlalandsliðsins, sýningum, ráðstefnum o.s.frv? Ef svo er þá er ekkert út á þetta að setja en þá stendur eftir spurningin um það hvar á fólk að leggja? Ég veit upp á mig skömmina og þræti ekki fyrir brotið en tek fram að í Kópavogi og mínum gömlu heimabæjum Akureyri og Patreksfirði er ekki verið að elta ólar við svona lagað. Svo lengi lærir sem lifir.

[Hulda Elma Guðmundsdóttir, 22.6.2008 kl. 09:37]

Er viss um að öðruvísi er staðið að þessu á karla landsleikjunum, enda er karla-ríki innan KSÍ, hefur verið og verður. Allir sem hafa fylgst með knattspyrnu muna hvernig fyrrverandi formaður hagaði sér gagnvart þeim konum sem komu að landsliðsþjálfun og ég held að ekki sé ástæða til að ætla að núverandi formaður haldi ekki sömu stefnu. "Við erum karlmenn, við ráðum"

[Sigurður Þórðarson, 22.6.2008 kl. 14:50]

Ég þekki þetta ekki enda bý ég nánast í Dalnum og geng á alla leiki, hvort sem það er Þróttur eða landsliðið sem spilar. Hitt er annað að mér þyka þessar getsakir í garð KSÍ tæplega við hæfi.  Ég var á leiknum og sá alla núverandi og fyrrverandi forystu KSÍ þarna eins og hún laggði sig. Annað hvort væri nú. Ég þekki nokkarar ágætiskonur sem stýra bílastæðasjóði með röggsemi. Þetta er óvinsæl skattheimta en henni er stýrt af sveitarfélögunum. Kannsk ætti ég að viðra þetta við Ólaf F. þegar ég hitti hann á morgun, þegar ég hitti hann í hádeginu? Hann er sérlega lipur náungu.