Ánægður með svar fjármálaráðherra

Þegar ég fór í prófkjör í aðdraganda síðustu kosninga var það eitt af stefnumálum mínum að koma á húsnæðissparnaðarreikning fyrir ungt fólk sem væri að kaupa í fyrsta sinn. Slíku kerfi skildi ætlað að hvetja til sparnaðar í stað þess að hvetja til lántöku eins og núverandi vaxtabótakerfi gerir. Ég var síðan svo heppinn að fjármálaráðherra skipaði mig í nefnd sem m.a. var ætlað að auðvelda þeim sem væru að kaupa sína fyrstu íbúð að stíga það skref. Ég gat því með hans fulltingi fylgt þessum hugmyndum eftir inni nefndinni sem varð til þess að ein af tillögum nefndarinnar var að koma á húsnæðissparnaðarrreikning.

Þessi sértæki sparnaður rataði svo inn yfirlýsingu ríkisstjórnarinnar frá 17. febrúar, í tengslum við kjarasamninga á almennum vinnumarkaði. Þar er sagt að komið verði á húsnæðissparnaðarkerfi með skattafrádrætti fyrir einstaklinga 35 ára og yngri til að hvetja til sparnaðar hjá þeim sem hyggja á fyrstu kaup eigin húsnæðis eða búseturéttar.

Það var svo í óundirbúnum fyrirspurnum síðastliðinn síðastliðinn þriðjudag að ég spurði fjármálaráðherra að því hvenær von væri á tillögum um ofangreinda sparnaðarleið.

Í lokin á svari sínu segir hann: "Ég geri mér vonir um að geta lagt fram til kynningar á þessu þingi frumvarp um húsnæðissparnaðarreikninga en það gengur auðvitað á tímann, það er ekki mikill tími eftir. En ég mun kappkosta að geta lagt slíkt frumvarp fram til kynningar áður en þingið fer í sumarleyfi".

Ég verð að viðurkenna að ég var ánægður með ráðherrann þennan dag því það er eitt helsta einkenni Árna M. Mathiesen að tala varlega og yfirleitt segir hann minna heldur en meira. Þegar hann svo tekur til máls með þessum hætti veit ég að það er farið að sjá fyrir endann á þessu máli.

Svar fjármálaráðherra.  http://www.althingi.is/raeda/135/rad20080506T135918.html

Athugasemdir

[Páll Jóhannesson, 12.5.2008 kl. 11:51]

Ég spyr líka ,,Ármann minn hefur þú nokkurn tímann áður haft ástæðu til að vera ánægður með hr. Árna Fjármálaráðherra?".

Með Þórskveðjum að norðan

[Heimir Lárusson Fjeldsted, 12.5.2008 kl. 14:44]

Kíktu á þetta Ármann með opnum huga og gott væri að fá álit þitt: 

 "Það er þörf á nýrri hugsun í félagslegri þjónustu við lágtekjufólk og eignalítið. Þessir hópar eiga fárra kosta völ þegar að húsnæðismálum kemur.

Þúsund manns eru á biðlista eftir félagslegu húsnæði í Reykjavík einni og sífellt bætist við. Leigumarkaðurinn er dýr og óhagkvæmur þrátt fyrir húsa- leigubætur.

Mín hugmynd er í stuttu máli þessi: Opinber sjóður, gæti verið á vegum ríkis og/eða borgar myndi leggja fé í íbúðarkaup með einstaklingum.

Tökum dæmi af  eignalitlum einstaklingi sem er á örorkubótum og hefur því ekki mikil fjárráð. Hann þarf sæmilega tveggja herbergja íbúð en getur ekki staðið undir afborgunum af hærra láni en sjö milljónum króna. Íbúðin kostar hinsvegar 15 milljónir og mun þá viðkomandi sjóður eiga þær átta milljónir sem upp á kaupverðið vantar.

Sjóðurinn mun ekki krefjast endurgreiðslu svo lengi sem einstaklingurinn býr við þröngan hag og mun heldur ekki krefjast leigugjalds af sínum hluta íbúðarinnar.

Einstaklingurinn býr sem sagt við öryggi og tiltölulega lágan húsnæðiskostnað og hið opinbera í þessu tilviki. Félagsbústaðir sem ég set inn í myndina núna geta sinnt félagslegum skyldum sínum af mun meiri krafti en hingað til. Sjálfsmynd einstaklingsins stækkar ef að líkum lætur."

[Theódór Norðkvist, 12.5.2008 kl. 16:10]

Voru kannski mistök að leggja niður gömlu sparimerkin?

[Ármann Kr. Ólafsson, 12.5.2008 kl. 18:24]

Þakka innlegg Heimis. Gott að fá málefnalega umfjöllun um það sem maður skrifar hér á síðunnu og víst er að ég mun hafa þessa athugasemd og í raun hugmyndafræði hennar, í bakhöndinni þegar fjallað er um félagslega húsnæðiskerfið

Hvað athugasemd Theódórs varðar tel ég að sparimerkin hafi verið barn síns tíma. Tel að sparnaður af þessu tagi eigi að vera valkvæður. Slíkur sparnaður var í boði á sínum tíma og sennilega hefði verið skynsamlegt að sníða af agnúana sem á þeirri sparnaðareið voru í stað þess að leggja hana niður.

Ég held að norðanmenn geti verið ánægðir með fjármálaráðherrann. Allavega þegar horft er til fjárveitinga úr sjóðum hins opinbera.

ES. það þótti eðlilegt í minni sveit að ókunnugir kynntu sig þegar þeir komu í heimssókn, annað hefði þótt kjarkleysi.